අප පලතුරු සහ එළවලු අහාරයට ගත යුත්තේ ඇයි ?
පලතුරු සහ එළවළු යනු, අප එදිනෙදා ආහාරයට ගත යුතු අංගයකි. පලතුරු සහ එළවළු ඉතා පහසුවෙන් සොයා ගත හැකි මෙන්ම පහසුවෙන් කෑමට ගත හැකි ආහා රයකි. එනමුදු, වර්තමානයේ දෛනික පලතුරු සහ එළවළු අනුභවය ඉතා අඩුය. එයට විවිධ හේතු පැවතිය හැකිය. එක් වැදගත් හේතුවක් වන්නේ, පලතුරු සහ එළවළුවල වැදගත්කම ගැන නිසි අවබෝධයක් නොමැති වීමයි.
ඇයි ඔබ පලතුරු සහ එළවළු ආහාරයට ගත යුත්තේ?
- තන්තුවලින් අති බහුල වීම
- විවිධ විටමින සහ ඛනිජ ලවණවලින් බහුල වීම
- කැලරි ප්‍රමාණය සහ තෙල් හෝ මේද ප්‍රමාණය අඩු වීම
- අධික ජල ප්‍රමාණයක් අඩංගු වීම
- සීනි හෝ ලූණු අඩු වීම
- ප්‍රතිඔක්සිකාරක සහ ශාක රසායනික ද්‍රව්‍යවලින් අති
- බහුල වීම ශරීරයේ අහිතකර ලෙස බර වැඩි වීම පාලනය කිරීම
- හෘද රෝග, පිලිකා, තරබාරුකම, දියවැඩියාව වැනි
- රෝග ඇති වීමට ඇති අවධානම අඩු කිරීම
විටමින සහ ඛනිජ ලවණ වර්ග ඒ, සී, ඊ වැනි විටමින වර්ග ද කැල්සියම්, පොටෑසියම්, සින්ක්, පොස්පරස්, ෆෝලික් අමිල වැනි ඛනිජ ලවණ වර්ග පලතුරු සහ එළවළුවල අඩංගු වේ. මෙම විටමින සහ ඛනිජ ලවණ එකක් හෝ දෙකක් එක් පලතුරක හෝ එළවළුවක වැඩිපුර ලෙස පවතී.
විටමින ඒ බහුල ආහාර කහ පැහැති පලතුරුවල සහ කහ පැහැති සහ තද කොල පැහැති එළවළුවල මෙම විටමිනය බහුලය.
උදා - අඹ, කොමඩු, තක්කාලි, පැපොල් වැනි පලතුරු සහ කැරට්, බතල, තද කොල පැහැති පලා වර්ග
විටමින සී බහුල ආහාර ඇඹුල් රසැති පලතුරුවල සාමාන්‍යයෙන් විටමින සී අධිකය.
උදා - දෙහි, දොඩම්, පේර, පැපොල්, තක්කාලි, අන්නාසි, ගෝවා, නිවිති, අර්තාපල්, මල්ගෝවා, රාබු
කැල්සියම් බහුල ආහාර කොල පැහැති එළවළුවල සහ බොහෝ පලතුරුවල කැල්සියම් අඩංගු වේ. කැල්සියම් අස්ථිවල පැවැත්මට අත්‍යාවශ්‍ය ඛනිජ ලවණයකි.
උදා - ඇපල්, කෙසෙල්, අලිගැට පේර, දොඩම්, රට ඉඳි, දෙළුම්, සියඹලා, ගෝවා, සුදුලුණු, බණ්ඩක්කා, තම්පලා
මැග්නීසියම් බහුල ආහාර මැග්නීසියම් නිරෝගී හදවතක් පවත්වා ගැනීමට අස්ථීවල සහ දත්වල පැවැත්මට අත්‍යාවශ්‍ය ඛනිජ ලවණයකි.
උදා -කෙසෙල්, අලිගැට පේර, පැෂන් ෆෘට්, රට ඉඳි, දෙළුම්, ස්ට්‍රෝඛෙරි, වට්ටක්කා, මල්ගෝවා, කොල පැහැති පලා වර්ග
පොටෑසියම් බහුල ආහාර පොටෑසියම් හෘදයේ ක්‍රියාකාරිත්වයට සහ රුධිර පීඩනය පාලනය අත්‍යාවශ්‍ය ඛනිජ ලවණයකි.
උදා -ඇපල්, කෙසෙල්, අලිගැට පේර, මිදි, රට ඉඳි, පෙයාර්ස්, මල්ගෝවා, බීට් රූට්, ගෝවා, කැරට්, ලීක්ස්, පිපිඤ්ඥා , වම්බටු, හතු
කෙඳි හෝ තන්තු පලතුරු සහ එළවළු ශාකමය ද්‍රව්‍ය නිසා තන්තුවලින් අති බහුල වේ. ලෙල්ල හෝ පොත්ත සමඟ පලතුරු ආහාරයට ගන්නා විට අප ශරීරයට එකතු වන තන්තු ප්‍රමාණය අධිකය. නමුත්, සෑම පලතුරක්ම එසේ කෑමට නොහැකිය. තන්තු සහිත ආහාර කෑමට ගන්නා විට ඉක්මනින් බඩ පිරීම සිදුවන අතර අප ගන්නා ආහාර ප්‍රමාණය සීමා කල හැක. එළවළු තන්තු බහුල මෙන්ම කැලරි ප්‍රමාණයද අඩුය. එමනිසා එළවළු අධික ලෙස ආහාරයට ගත හැක. එළවළු සලාද, එළවළු සුප් හෝ තැම්බූ එළවළු වැඩිපුර ආහාරයට එකතු කරගත යුතුය.
මෙම තන්තු මගින් මල බද්ධය, දියවැඩියාව, රුධිරයේ අධික කොලෙස්ටෙරෝල් වැනි තවත් බොහෝ රෝග නිවාරණය කරයි.
ප්‍රතිඔක්සිකාරක සහ ශාක රසායනික ද්‍රව්‍ය ප්‍රතිඔක්සිකාරක යනු, ශාක රසායනික ද්‍රව්‍යයකි. එය ශරීරයේ සිදුවන දේහ ක්‍රියාකාරිත්වයෙන් නිපදවෙන අහිතකර අතුරු ඵල මගින් සහ ආහාර සමඟ ශරීරයට ඇතුලූවන විශ ද්‍රව්‍ය මගින් සිදු විය හැකි හානි වළක්වාලන ද්‍රව්‍යයකි. විශේෂයෙන් මෙම ප්‍රතිඔක්සිකාරක මගින් පිළිකා රෝගය සහ අනෙකුත් සමහර රෝග ඇති වීම වළක්වනු ලැබේ. පලතුරු සහ එළවළුවල ඇති ප්‍රතිඔක්සිකාරකයන් කිහිපයක් නම් විටමින ඒ, විටමින සී, විටමින ඊ, කැරොටීන්. මෙම ශාක රසායනික ද්‍රව්‍ය මගින් පලතුරු සහ එළවළුවලට වර්ණයක් ලබා දේ.
පෝෂණවේදිනී
ෂාකිරා සිද්දීක්
- මග්ගොන
