දික්කසාදය හා ඉස්ලාම් නීතියේ කාන්තා අයිතිවාසිකම්
ඉස්ලාමය තුළ විවාහය සම්බන්ධව මෙන්ම දික් කසාදය සම්බන්ධයෙන්ද ඉතා සාධාරණ ලෙස කාන්තා පාර්ශවයට යුක්තිය ඉටුකර තිබෙන සැටි අවබෝධ කර ගැනීමට පසුගිය සතියේ පළ වූ දික්කසාදය හා ඉස්ලාමි නීතිය පළමු ලිපිය මෙන්ම අද ලියැවෙන මේ ලිපියද වැදගත් පිටිවහලක් වනු නිසැකය.
සත්‍ය වශයෙන්ම ඉස්ලාමය තුළ කාන්තා භූමිකාව සම්බන්ධයෙන් ඇති තතු නොදැන වැරැදි මතයක පිහිටා සිටින අන්‍ය ආගමික ප්‍රජාව මෙවැනි ලිපි මගින් කාන්තාවට ඉස්ලාමය තුළ ලබා දී තිබෙන වැදගත්කම අවබෝධ කරගනු ඇත.
යම්කිසි ඉස්ලාම් භක්තියකුට සිය බිරිය දික්කසාද කිරීමට හේතු කෙතරම් තිබුණ ද ඉස්ලාමීය නීතියට අනුකූ®ල නොවන කිසිදු හේතුවක් මත ඇයව දික්කසාද කිරීමට ඔහුට නොහැකිය.
එමෙන්ම යම්කිසි ස්ත්‍රීයකට සිය සැමියා දික්කසාද කිරීම සම්බන්ධව ඉතා වැදගත් කරුණක් ඉස්ලාමය තුළ පැහැදිලිව සඳහන් වේ.
එනම් සුව කළ නොහැකි ලාදුරු රෝගය , උමතුභාවය සංසර්ගයට බාධාවන ආකාරයේ ශාරීරික හා ලිංගික දුබලතා වැනි බරපතල හේතූන් මත සිය සැමියාගෙන් දික්කසාද වීමේ අයිතිය ස්ත්‍රීන් සතුය. මෙවැනි දික්කසාද ඉස්ලාම් නීති ශාස්ත්‍රයේ ‘’ෆස්හ්’’ නමින් හැඳින්වේ.
නමුත් උමතු රෝගය දික්කසාද වීමට තරම් ප්‍රබල හේතුවක් ලෙස ජර්මනිය, ස්විට්සර්ලන්තයේ වැනි රටවල පිළිගනු නොලැබේ. එමෙන්ම බරපතළ රෝගී සැමියාගෙන් දික්කසාද වීම නොව ඔහු රැක බලාගත යුතුය යන්න ප්‍රංශ නිතියෙන් ඉගැන්වේ. එවැනි මානව හිතවාදි හා සෙනෙහස සපිරුණු කරුණු කාරණා තිබුණ ද සැමියාට මෙන්ම බිරියටත් දික්කසාදයේ දී එක හා සමාන අයිතියක් තිබීමේ වැදගත් කම ඉස්ලාමය තුළ පැහැදිලිව සඳහන් වේ.
විවාහ ගිවිසුමෙන් වටහා ගන්නා ආකාරයට නඩත්තුව නොසපයන , පහසුකම් ලබා නොදෙන , හෝ ඒවා ලබා ගැනීමට බාධා ඇති කරන එසේ නොවේ නම් පවුල් ජීවිතයේ දී නොගැලපුම පවතින විටකදි ඉස්ලාම් දික් කසාද නීතියේ පිහිට පැතීමට ස්ත්‍රීයට පිළිවන.
තව ද සැමියා විසින් සිය බිරියගේ චරිතය, අවංක කම, පිරිසුදු කම, සතුටු කිරීමේ හැකියාව ආදීන් පිළිබඳව ඇය වෙත චෝදනා එල්ල කරනු ලැබු විට විනිශ්චයකරු ඉදිරියේ දී මෙම චෝදනා ඔප්පු කර දැක් වීමට නොහැකි වුවහොත් ඕ නිදහස් කරන ලෙස නියම කිරීමට විනිසුරුවරයාට පිළිවන.
සාධාරණ හේතූ®න් මත විවාහ ජීවිතයෙන් අනන්තයටම කළ කිරෙන බිරියක් දායාද වශයෙන් සැමියා විසින් ලබා දෙන ලද ධනයෙන් ප්‍රමාණවත් කොටසක් යළි ඔහුට ලබා දීමෙන් ද, දික්කසාදයෙන් පසුව මුල් මාස කීපය තුªªළ ගෙවිය යුතු නඩත්තුවලින් ඔහු නිදහස්කොට ද දික්කසාදය ලබාගත හැකිය.
එමෙන්ම සැමියා ආගියඅතක් සොයා ගැනීමට නොහැකි ලෙස අතුරුදහන් වූ මොහොතක හෝ ඇය හැර දමා පලා ගිය මොහොතක (සොයා ගැනීමට නොහැකි විටකදී) සිය ජීවිකාව ගෙන යාමට බිරියට නොහැකි වනවිට දික් කසාදය ඉල්ලා සිටීමට ඇයට හැකිය.
විවාහයේ දී ස්ත්‍රීයකට ලැබෙන වටිනාකම, ගරුත්වය ඒ ආකාරයෙන්ම දික් කසාදය තුළදීත් ආරක්ෂා කරදීම ඉස්ලාමයේ දක්නට ලැබෙන ඉතා වැදගත් ලක්ෂණයකි.
බහු විවාහ සංකල්පයේ දී ඉස්ලාමය තුළ සැමියා සම්බන්ධව ඉතා පක්ෂපාතිව කරුණු දක්වා ඇතැයි යන මතය ඉස්ලාමීය දික්කසාද නීතිරීති වලදි බිඳ වැටෙන බව මින් පැහැදිලි කර ගැනීමට ඕනෑම අයෙකුට හැකිය.
